Verð ég líka rekin?

Stjórn VR samþykkti í dag vantraust á Bjarka Steingrímsson Varaformann VR. 

Ástæða þess má rekja til ræðu sem hann flutti á austurvelli þar sem hann vann sér það til saka að gagnrýna verkalýðsforystuna og gera nákvæmlega það sem hann sagðist ætla að gera þegar hann bauð sig fram, og vann yfirburðar sigur, í síðustu VR kosningum.

Ég og Bjarki höfum gagnrýnt verkalýðsforystuna harðlega fyrir að taka ekki afstöðu í mikilvægum hagsmunamálum launþega svo sem verðtryggingu,myntkörfulánum,bílalánum og fáránlegum skattaálögum sem engu skiluðu nema aukinni kaupmáttarrýrnun og hækkun húsnæðlána.

Þessi lögvarði þjófnaður á eignum almennings í skjóli verkalýðshreyfingarinnar verður ekki liðinn mikið lengur.

Það hlakkar sjálfsagt í verkalýðskóngunum sem náðu góðu höggi á góðan mann í dag.

Verði þeim að góðu!

Þetta sýnir okkur að við erum á hárréttri braut.

Dapurleg framkoma við Bjarka sem hefur sýnt mikin kjark,þor og frumkvæði.

Vil um leið óska varaþingmanni framsóknarflokksins og tækifæris sinnanum Ástu Rut Jónasdóttur, velfarnaðar í nýju embætti varaformannns. Vonandi heyrum við eitthvað frá henni á næstuni, svona til tilbreytingar.

Ræðan mín á Austurvelli,  sjá hér en þetta er það sem ASÍ klíkan þolir ekki að heyra né sjá  en er að okkar mati sjálfsögð krafa.

Ætli ég sé næstur?

Kveðja

Ragnar Þór

Ræðan mín á Austurvelli 12/12.

Virðing og Réttlæti? Þetta eru stór orð. Hvernig náum við fram réttlæti ? Hvernig fáum við þá virðingu sem við eigum skilið.

Virðing og réttlæti fæst ekki fyrir flugpunkta eða heima í stofu.

Það er fullreynt að stóla á þá sem þiggja dágóðan hlut af launum okkar til að sinna hagsmunagæslu fyrir okkar hönd.

Við fáum ekkert upp í hendurnar gott fólk.

Við verðum að gera þetta sjálf.

Það hjálpar okkur engin.

Við horfum upp á stórfelldan þjófnað í fasteignum landsmanna í formi verðbóta og myntkörfulána.

Hverjir hirða þýfið?

Bankar og Lífeyrissjóðir hafa stórlagað eignastöðu sína með því að nota verðbætur húsnæðislána og stökkbreytt myntkörfulán til að breiða yfir tapið á útrásarbullinu.

Lífeyrissjóðirnir eiga að tryggja okkur lífeyri. En ekki með því að stela af okkur milljónum með vinstri til að borga okkur nokkrar krónur með þeirri hægri.

Heimilin eru okkar mikilvægasti lífeyrir og öryggisnet. Ef sjóðirnir tapa á braski sínu þá eiga fasteignir okkar að vera öryggisnetið sem grípur okkur. OKKUR en ekki banka og lífeyrissjóði.

Við þurfum að afnema Verðtryggingu tafarlaust og setja þak á vexti.

Þetta er eina leiðin til að þrýsta á að peningamálum verði stýrt hér af skynsemi með almanna hag að leiðarljósi í stað þess að gera það með rassgatinu.  Með rassgatinu í þágu útvaldra á kostnað almennings eins og gert hefur verið síðastliðna áratugi.

Verkalýðsforystan skuldar launafólki að berjast fyrir afnámi verðtryggingar. Þetta er óuppgert loforð síðan vísitölutrygging launa var afnumin fyrir rúmlega 25 árum síðan, með einu pennastriki.

Er ekki komin tími til að standa við það loforð?

Stöðugleiki þarf að vera allra hagur ekki bara hins almenna.

Verðtrygging er mannanna verk og það eru engir aðrir sem geta tekið hana af.

Hagfræðingar ASÍ sem styðja þetta krabbamein sem er að éta upp heimilin innan frá spyrja, hvað á að koma í staðinn.

Ég segi: EKKI NEITT ! það er komin tími á að fjármagnseigendur taki ábyrgð á gjörðum sínum.

Það eru þeir sem hafa skapað þann óstöðugleika og það ástand sem við okkur blasir í dag og það eru þeir sem eru varðir á kostnað almennings. Við höfum borgað brúsann alltof lengi.Við höfum borgað brúsann í 25 ár.

Það eru yfir 30 lífeyrissjóðir sem taka við lögbundnu 12% iðgjaldi af launum alls vinnandi fólks.

Af hverju alla þessa sjóði?

Ekki þurfa norðmenn marga olíusjóði svo mikið er víst.

Við borgum 37,2% í skatt.Við borgum 12% í lífeyrissjóð 7% í Tryggingagjald

Við borgum í Stéttarfélagög, Sjúkrasjóð, Orlofssjóði,Starfsmenntunarsjóði,endurmenntunar,símenntunar- og endurhæfingasjóði til SA/ASÍ.

Hvaða nöfnum sem þetta nú allt saman heitir borga launafólk og atvinnurekendur nálægt  60% af heildarlaunum sínum í einhvers konar skatt ef launatengd gjöld eru tekin með í reikningin.

Í síðustu kjarasamningum var samið um enn einn sjóðinn sem heitir endurhæfingarsjóður sem hefur þann tilgang að fækka öryrkjum á kostnað öryrkja.

Þessi sjóður kemur til með að hafa um 3000 milljónir til ráðstöfunar. Hver ætli stjórni þessum sjóð? Gylfi Arnbjörnsson, Vilhjálmur Egilsson og co.

Þetta er enn eitt skrefið í átt að einkavæðingu heilbrigðisþjónustunnar.

Þetta er enn eitt skrefið í átt að því að þeir sem greiða ekki til stéttarfélaga verður gróflega mismunað.

Er ekki komið nóg af sjóðum?

Aðilar vinnumarkaðarinns og lífeyrissjóðirnir eru orðnir Ríki í Ríki sem keppast um stærri og stærri hlut af launum almennings.

Hverjar eru kröfur aðila vinnumarkaðarins í dag, á meðan heimilin standa í ljósum logum?

Kröfurnar eru yfirráð yfir atvinnuleysistryggingasjóði. Sem þýðir að 7% tryggingagjald færist frá Ríkinu yfir til aðila vinnumarkaðarins. Þetta hefur ekkert að gera með hag atvinnulausra heldur völd yfir stærri sneið af kökunni. 

Er ekki komin tími til að vinna fyrir okkur? Okkur sem borgum laun þessara verkalýðsgæðinga.

Ekki var neyslusköttunum mótmælt sem engu skiluðu nema hækkun húsnæðislána !

Ekki kom til greina að skoða skattlagningu lífeyris sem er líklega eina raunhæfa leiðin til að hlífa heimilunum.

Forystusauðir ASÍ styðja verðtryggingu,fagna aðkomu AGS og ríkisábyrgð á Icesave sem verður líklega síðasti naglinn í líkistu velferðar á íslandi eins og við þekkjum hana í dag.

Fyrir hverja er þetta fólk að vinna?

Ég segi NEI við AGS

Ég vil frekar lifa á fiski, en sem máltíð á diski, hjá þessu hyski.

Hér er rekið samfélag útvaldra sem græða á kostnað almennings í landinu. Gróðin er engin snilld og hinir útvöldu eru engir snillingar.

Gróðinn er þýfi. Gróðinn er lögvarinn blóðpeningur.

Hinir útvöldu eru nútímavæddir þjófar og þjófnaðurinn fer fram í skjóli bankaleyndar og þagnarskyldu. Þjófnaðurinn fer fram um hábjartan dag beint fyrir framan nefið á okkur undir verndarvæng ríkisstjórnarinnar og aðila vinnumarkaðarins.

Verkalýðshreyfingin er að velta yfir 10 milljörðum á ári, rekstrarkostnaður er um 2 milljarðar.

Lífeyrissjóðirnir eru að velta um 300 milljörðum á ári og rekstrarkostnaður um 4 milljarðar.

Það fer um 60% af heildar launum okkar í skatta og önnur launatengd vel falin gjöld.  

Gleymum því ekki að VIÐ almenningur erum ríkið og VIÐ eigum lífeyrissjóðina, og það erum VIÐ sem greiðum í stéttarfélögin.

Það erum Við sem getum breytt þessu.

Framtakssjóður Íslands.

Gott framtak eða sama bullið?

Fulltrúar sextán lífeyrissjóða innan vébanda Landssamtaka lífeyrissjóða hafa stofnað formlega, Framtakssjóð Íslands, nýtt fjárfestingarfélag sem ætlað er að taka þátt í og móta fjárhagslega og rekstrarlega endurreisn íslensks atvinnulífs í kjölfar falls fjármálakerfisins.

Lífeyrissjóðir landsmanna voru notaðir sem opnar pyngjur útrásar ofurhuga og ekki verður betur séð en að sami hákarla hópurinn og stjórnaði gengdarlausum fjárfestingum lífeyrissjóðanna í útrásarvitleysunni standi á bakvið þennan sama sjóð.

Fyrir mig sem hef gagnrýnt þessa menn,þetta kerfi og þessar fjárfestingar eru þetta ekkert annað en Úlfar í sauðagæru.

Af hverju gerðu lífeyrissjóðirnir ekki tilboð í öll húsnæðislán bankanna, sem þeir hefðu eflaust getað fengið með töluverðum affölum til hagsbóta fyrir sjóðina og almenning í landinu svo fátt eitt sé nefnt.

Það fylgja því ekki mikil völd í viðskiptalífinu að byggja þjónustu íbúðir fyrir aldraða sjóðsfélaga eða fjárfesta í húsnæðislánum sem teljast með öruggari verðtryggðum fjárfestingum að ríkisskuldabréfum frátöldum.

Völdin sem felast í því að stjórna svona sjóð, þar sem fjarmagn á markaði er af skornum skammti, eru gríðarleg.

En hverjir eru í stjórn þessa sjóðs?

Dæmi: Ragnar Önundarson, stjórnarformaður Lífeyrissjóðs Verslunarmanna.

Kristinn Örn formaður VR lagði mikla áherslu á að Ragnar Önundarson yrði skipaður stjórnarformaður LV. Við vorum nokkur í stjórninni sem töldum þessa skipan vera glórulausa enda vissum við ekkert um manninn né áherslur hans og afstöðu til bankaleyndar svo fatt eitt sé nefnt, í ljósi þess að krafa félagsmanna var gegnsæi í fjarfestingum sjóðsins. Það kom svo á daginn að Ragnar hefur barist harkalega gegn sjálfsögðu gegnsæi og séð til þess að sjóðurinn er lokaðri sjóðsfélögum en áður. Þrátt fyrir álit FME sem styður kröfur okkar sjóðsfélaga.

Hver er Ragnar Önundarson?

Ragnar Önundarson var áður framkvæmdastjóri Kreditkort hf, sem varð svo Borgun hf.  Hann, ásamt Halldóri Guðbjarnasyni, voru höfuðpaurarnir í stærsta viðurkennda samkeppnislagabroti Íslandssögunnar og gæti verið vafasamt að maður með þennan afbrotaferil sé ráðinn eða skipaður sem formaður stjórnar Lífeyrissjóðs verslunarmanna.  Auðvitað er batnandi mönnum best að lifa, en það er rétt rúmlega ár síðan hann var látinn víkja sem framkvæmdastjóri frá Borgun vegna samkeppnislagabrotana. 

Það eru því ódýr svör hjá Ragnari Önundarsyni að hann hafi ekki verið aðili málsins.  En það sem hann gerir er athyglisvert, hann segir að samkeppnislagabrotin hafi verið á vegum og ábyrgð eigenda og stjórnarmanna.  Ef við skoðum það aðeins nánar, þá er hann með þessu að ásaka og beina ábyrgðinni á þessum viðurkenndu samkeppnislagabrotum að fyrrum stjórnarmönnum Borgunar hf. (áður Kreditkort hf.), sem voru m.a. þessir:
Birna Einarsdóttir  (núverandi bankastjóri Íslandsbanka), sat fyrir Glitnir árið 2007 og tók þ.a.l. þátt í samkomulaginu við Samkeppniseftirlitið
Finnur Sveinbjörnsson  (núverandi bankastjóri Nýja Kaupþings), sat fyrir Landsbanka Íslands á árinu 2008
Haukur Oddsson  (núverandi forstjóri Borgunar), var stjórnarformaður árið 2006, sat fyrir Glitnir.

Spurning hvort það væri tilefni fyrir Blaðamenn að skoða þessi svör aðeins nánar, hvort þessir aðilar eru á sama máli varðandi hver stóð á bakvið og beri ábyrgð á þessum viðkurkenndu samkeppnislagabrotum.  Það eitt að Ragnar Önundarson er að beina ábyrgðinni frá sér,og að þessum aðilum þarfnast nánari skoðun.

 
Málið endaði með sátt, eins og Ragnar Önundarson segir í grein sinni í Mogganum 29 sept., en hann nefndi ekki að sáttin fól í sér að félögin viðurkenndu samkeppnislagabrot, sem skv. Samkeppniseftirlitinu voru langvarandi og víðtæk ólögmæt samráð, eða mjög alvarleg brot á 10. og 11. gr. samkeppnislaga sem voru til þess fallin að valda verulegri röskun á samkeppni, brotin voru framin af ásetningi og höfðu það m.a. að markmiði að koma keppinauti út af markaði, brotin náðu yfir langt tímabil’.

Eins og forstjóri Samkeppniseftirlitsins segir var þetta mál fast á eftir olíufélagamálum í alvarleika.  Þá fól sáttin í sér að málið yrði ekki sent áfram til ríkissaksóknara, en þar hefði Ragnar Önundarson orðið formlegur málsaðili og fengið sinn andmælarétt (og væntanlega fengið sinn dóm fyrir).  Þetta er kannski það alvarlegasta í þessu máli, að kortafélögin og eigendur þeirra borguðu fyrir að málið yrði ekki sent áfram til ríkissaksóknara, en það er ótrúlegt að það sé hægt að semja um slíkt. 

Það mætti því segja að kortafélögin hafi greitt fyrir það að Ragnar Önundarson héldi sínu frelsi og yrði ekki persónulega refsað.  Það að Ragnar Önundarson teljist fyrir vikið ekki vera málsaðili, þrátt fyrir að hafa verið annar höfuðpaurinn og gerandinn í þessum lögbrotum, staðfestir það að fyrirtæki geti brotið af sér án þess að framkvæmdastjóri beri neina ábyrgð af því.  Þetta eru mjög hættuleg skilaboð og ég efast um að menn sætti sig við að hafa mann, ekki bara með slíkan bakgrunn, heldur sérstaklega með slíkt mat sem stjórnarformann lífeyrissjóðs Verslunarmanna.  Og stjórnarmann í hinum nýja Framtakssjóð Íslands.

Hvað ætli samkeppnislagabrotin hafi kostað almenning í landinu fyrir utan þær 735 milljónir sem voru greiddar í sektir úr almennings hlutafélögunum til að kaupa stjórnendur frá dómi?

Getum við treyst Ragnari Önundarsyni fyrir framtíðar lífeyri okkar?

Hvað borgum við í skatta ?

Á Íslandi fer um 60% af heildarlaunakostnaði fyrirtækja við eitt stk. Launamann í skatta og launatengd gjöld, ef tekin eru með félagsgjöld í stéttarfélög. Þetta er fyrir utan viðbótarframlag í séreigna lífeyrissjóði.

Borgum við 37,2% í skatt? Hvað er skattur og hvað ekki?

Ef við tökum lögbundið 12% iðgjald í lífeyrissjóð hvernig stendur hlutfallið þá?

Dæmi:

Tekjuskattur er 37,2%(á launaseðli)

Lífeyrissjóður 4%(á launaseðli) +8%(Launatengd gjöld) =12%

Tryggingagjald 7% (Launatengd gjöld)

Stéttarfélag félagsgjald 1%(á launaseðli)

Sjúkrasjóður 1% (Launatengd gjöld)

Orlofssjóður 0,25%(Launatengd gjöld)

Endurhæfingarsjóður 0,13% (Launatengd gjöld)

Starfsmenntunarsjóðir,endurmenntunar- og endurhæfingasjóður SA/ASÍ allt að 0,25% (Launatengd gjöld)

Samtals 58,83% af heildar launakostnaði.

Hvaða nöfnum sem þetta nú allt saman heitir borga launafólk og atvinnurekendur nálægt  60% af launum sínum í einhvers konar skatt ef launatengd gjöld eru tekin með.

Launakostnaður er skilgreindur í ársskýrslum fyrirtækja sem  Laun og launatengd gjöld.

Hver eru launatengd gjöld í Danmörku þar sem greiðslubirgði vegna lífeyrisþega er tekin með í skatt prósentuna?

Forkálfar lífeyrissjóða og stéttarfélags mafíunnar kalla þetta gegnumstreymi og segja eitt af því alversta sem til er. Ath. "Þetta er skoðun þeirra sem fara með völdin yfir framtíðar skatttekjum ríkissjóðs".

Nú ætla lífeyrissjóðirnir að skuldbinda ríkið "okkur fólkið" til framtíðar með því að fjármagna nýtt háskólasjúkrahús,nýjan flugvöll og fleiri framkvæmdir á vegum ríkis og sveitarfélaga. Hverjir borga þessar framkvæmdir aðrir en framtíðar skattgreiðendur?

Þessir sömu lífeyrissjóðir þvertaka fyrir að ríkið leysi til sín skatt af séreignasparnaði vegna þess að það komi svo illa niður á börnum okkar sem þurfa að bera skattbirgði framtíðarinnar.

Ekki höfðu lífeyrissjóðirnir sýnilegar áhyggjur af sömu börnum þegar þeir héldu útrásarkóngunum uppi með því að dæla fjármagni í útrásarfélögin sem varð megin uppistaða innlendra fjárfestinga lífeyrissjóðanna.

Varla hafa lífeyris forstjórarnir hugsað mikið um þessi sömu börn þegar þeir voru við laxveiðar eða í lúxusferðum í boði Baugs, Existu, Fl-group eða bankanna sem sáu um að koma peningunum í "réttar hendur".

Ætli börnin hafi komið upp í huga þeirra sem þáðu 34 milljónir í árslaun, cadillac jeppa, bensín á hann og uppihald hvers kyns?

Blessuð börnin!

Ætli börnin okkar hafi einhvern áhuga á að búa í þessu spillingar bæli? Þau þurfa að halda uppi stórskuldugum eftirlaunaþegum þar sem framtíðarlífeyrir okkar mun varla duga fyrir afborgun á húsnæðis skuldum vegna þeirrar eignaupptöku sem heimilin og almenningur stendur frami fyrir í dag.

Ég hef meiri áhyggjur af því að geta brauðfætt börnin mín og menntað til framtíðar en að þau verði virkir skattgreiðendur. 

Svo á að hækka skatta og halda í verðtrygginguna! 

Eru stjórnvöld gjörsamlega gengin af göflunum?

Er þriðja valdið, Lífeyrissjóðir og SAASÍ  orðið Ríki í Ríki, sem keppast innbyrgðis um að klípa sem mest af launafólki. Ríkið með endalausum gjöldum og hitt ríkið með endalausum sjóðum?

Í síðustu kjarasamningum var samið um enn einn sjóðinn,endurhæfingasjóð sem á að fækka öryrkjum á kostnað öryrkja.

Er ekki komið nóg af sjóðum?

Verkalýðshreyfingin er að velta yfir 10 milljörðum á ári, rekstrarkostnaður er um 2 milljarðar.

Lífeyrissjóðirnir eru að velta um 300 milljörðum á ári og rekstrarkostnaður um 3 milljarðar en líklega yfir 4 milljarðar ef erlend fjárfestingagjöld væru tekin með í reikningin.

Við almenningur erum ríkið og eigum lífeyrissjóðina, dælum fjármagni í stéttarfélögin en höfum því miður ekkert um málin að segja.

Guð hjálpi íslenskri alþýðu.

Hagnaður!!

Lífeyrissjóðir eru meðal stærstu kröfuhafa. Hafa þessir menn greitt af BAKK 03 01 skuldabréfaútgáfu sem hefur verið í vanskilum frá því í vor? Þeir sýna fram á hagnað en borga ekki af skuldbindingum sínum. Það er eitt af þeim málum sem þeir minnast á í þessari yfirlýsingu að viðræður við innlenda lánadrottna (lífeyrissjóði) gangi vel en þar tala þeir um lengingu á skuldabréfavafningum.

Lífeyrissjóðirnir töpuðu hundruð milljörðum á þessum snillingum.

Þeir tóku Bakkavör með glæpsamlegum hætti út úr Existu á kostnað kröfuhafa og eigenda.

Ég hef nú nokkrum sinnum áður lesið um skínandi góða afkomu frá þeim Bakkabræðrum m.a. frá Kaupþingi, Existu, Bakkavör en tvö áðurnefnd félög hafa verið sektuð af kauphöll fyrir að gefa upp misvísandi upplýsingar um stöðu.

Er þeim virkilega treystandi?

Hagnaður hjá Bakkavör

Vantar ekki eitthvað inn í jöfnuna?

Skattbyrgði sem hlutfall af vergri landsframleiðslu ? Í Danmörku er skatturinn 48,3% en á íslandi komin niður í 36%. 

Ef við tökum lögbundið 12% iðgjald allra launa í lífeyrissjóð hvernig stendur hlutfallið þá?

Á Íslandi fer um 60% af heildarlaunakostnaði við 1 stk. starfsmann í skatta og launatengd gjöld, ef tekin eru með félagsgjöld í Stéttarfélögin. Þetta er að vísu fyrir utan persónuafslátt.

Tekjuskattur er 37,2%

Lífeyrissjóður 4%+8% =12%  ( 8% launatengd gjöld)

Tryggingagjald 7% (Launatengd gjöld)

Stéttarfélag félagsgjald 1%(Val)

Sjúkrasjóður 1% (Launateng:Val)

Orlofssjóður 0,25%(Launateng:Val)

Endurhæfingarsjóður 0,13%

Starfsmenntunarsjóðir SA/ASÍ allt að 0,25%

Hvaða nöfnum sem þetta nú allt saman heitir borgar launafólk um 60% af launum sínum í einhvers konar skatt ef launatengd gjöld eru tekin með.

Allavega er launakostnaður skilgreindur í ársskýrslum fyrirtækja sem  Laun og launatengd gjöld.

Hver eru launatengd gjöld í Danmörku þar sem greiðslubirgði vegna lífeyris er tekin með í skatt prósentuna. Sem forkálfar lífeyrissjóða kalla gegnumstreymi og er víst eitt af því alversta sem til er að þeirra sögn sem fara með völdin yfir framtíðar skatt tekjum ríkisins.

 

Skattbyrðin lækkaði mest hér í fyrra

Það tókst !

ASÍ og SA tókst að koma hugsanlegri skattlagningu lífeyrissjóða yfir á okkur fólkið. 

Þó svo lífeyrissjóðirnir/SAASÍ haldi því fram, að ef þeir fái framtíðar skatttekjur ríkisins/þjóðarinnar lánaðar skili það okkur hærri lífeyri. Það er ekki alveg rétt. Það gæti hinsvegar orðið ef ávöxtun lífeyrissjóðanna verður góð. Þeir hafa nú ekki beinlínis sýnt fram á það með trúverðugum hætti.

Hvað verður búið að tapa miklu af framtíðar skattstofni ríkisins/þjóðarinnar í lífeyrissjóðunum á næstu tveimur áratugum?

Ríkið/þjóðin er að borga 5,5% vexti af Icesave á meðan ríkið/þjóðin lánar framtíðar skattekjur til lífeyrissjóða/SAASÍ sem hafa ávaxtað sig um 2,9% síðustu 10 ár. ( 2,9% miðað við mjög svo ótruverðuga útgáfu sjóðanna á tapinu en mikið á enn eftir að afskrifa )

Staðreyndin er sú,miðað við tryggingafræðilega stöðu sjóðanna, þá eru þeir í hæstu neikvæðu mörkum. Þrátt fyrir að eiga miklar afskriftir eftir á verðlausum eða verðlitlum eignum. Sumar geta þeir þó varið með því að lengja í skuldabréfavafningum eða lána til fyrirtækja sem ekki verða sett í þrot alveg strax, eingöngu til að afskrifa síðar og dreifa þannig tapinu.

Það er kanski helsta skýringin á því hversu hatrammlega valdaklíka atvinnumála ASÍ og SA barðist gegn þessari leið því það setur stórt strik í plön þeirra um að vinna til baka tapið á útrásarbullinu þar sem forkálfar nokkura stærstu sjóðanna voru í aðalhlutverki.

Ég vil óska ASÍ til hamingju með þennan frábæra árangur. Og atvinnurekendum líka þar sem mörg fyrirtæki eru að fá starfmenn sína til að falla frá kjarasamningsbundnum hækkunum.

Ég vil líka hrósa markaðslaunakerfinu "framboð og eftirspurn" sem verkalýðsforystan hefur monntað sig af. Eina raunvörulega öryggisnetið sem almennt launafólk hefur eru Taxtar.

Verkalýðshreyfingin er að velta yfir 10 milljörðum á ári, rekstrarkostnaður er um 2 milljarðar.

Lífeyrissjóðirnir eru að velta um 300 milljörðum á ári og rekstrarkostnaður um 3 milljarðar en líklega yfir 4 milljarðar ef erlend fjárfestingagjöld væru tekin með í reikningin.

Eitt er þó víst að allur þessi kostnaður er greiddur af launafólki og allir þessir fjármunir eru í eigu launafólks og almennings í landinu.

Er ég einn um það að finnast uppskeran heldur rýr?

 

50 milljarða skattahækkanir

Skólafrí !

Það er ekki hægt að bjóða upp á öll þessi endalausu skólafrí. Fólk sem á börn á grunnskólaaldri þarf orðið að nota stóran hluta af sumarfríinu sínu í þetta og endar með að eiga einhverjar 3 vikur í sumarfrí á meðan kennarar fara í sumarfrí í einhverja mánuði.

Á meðan eru foreldrar í sífelldum reddingum hjá ættingjum, rándýrum leikjanámskeiðum o.s.frv. Það vantar nýja hugsun í þetta. Hættum að láta kjarabáráttu kennara bitna á foreldrum sem þurfa að taka sér sumarfrí vegna endalausra frídaga kennara.

Það á ekki að taka út kjarabætur til kennara með því að ganga á sumarfrí foreldra.

Þetta er algjört bull eins og þetta er í dag og þjónar hvorki hagsmunum barna né foreldra. Getum við ekki bara hætt þessum feluleik, hækkað laun kennara og fengið þá til að skipuleggja sína vinnu og vinnutíma eins og annað fólk?

Og úr því að við erum að tala um nýja hugsun; hefur einhver pælt í því að láta íþróttafélögin og aðrar tómstundir taka við börnum strax eftir að skóla líkur? Þá þyrfti ekki að vesenast með ÍTR sem millilið í skólaseli eða frístund sem yfirleitt eru rekin á lágmarks mannskap og örvun fyrir börnin.

 

Foreldrar þurfa að sækja börnin í hendingskasti eftir vinnu og koma þeim í tómstundir. Fjölskyldan er svo komin heim 18-19 og allir búnir á því. Væri ekki nær að hafa tómstundirnar í þessum steindauða tíma eftir skóla og gefa börnum og foreldrum tækifæri á að eyða meiri tíma saman þegar vinnu, skóla og tómstundum líkur?

 

 

Fékk þennan pistil sendan og þar sem ég á 3 börn, tvö á grunnskólaaldri, tek ég undir þetta. Það getur stundum verið ansi snúið á annasömu heimili að stilla þetta saman með tómstundum.

Hver eru þolmörk þjóðarinnar?

Hversu langt er hægt að ganga á umburðarlyndi almennings með þessum dæmalausa skrípaleik.

Ef almenningur sættir sig við þetta, þegjandi og hljóðalaust, þá er ekki von á frekari siðbót í þessu helsýkta og meðvirka samfélagi.

Er ekki dæmigert hve litla athygli þetta mál fær í fjölmiðlum.

Ekki verður siðbótin fengin með því að brotamenn dæmi sig sjálfir svo mikið er víst. Ef einn pólitískur gerandinn er ekki sammála hinum, þá fellur málið um sjálft sig ! 

Skjaldborg fjórflokksins !

Borgarahreyfingin ósátt við skipun nefndar

1998 og Haga í greiðslujöfnun !

Hvernig væri að miða allar skuldir Haga/1998 við greiðslugetu á 40 ára láni með breytilegum markaðsvöxtum og setja eftirstöðvarnar umfram greiðsluþol á greiðslujöfnunarreikning sem er svo vísitölu bundin veðurfari á vesturlandi.

Það sem fæst upp í skuldirnar verður notað til að greiða upp óreiðuna sem þessir menn skyldu eftir sig. Þetta gætum við gert við fleiri fyrirtæki fyrrverandi útrásarkónga og kúlulánabraskara. 

Eina úrræðaleysan sem í boði er fyrir almenning og heimili í greiðsluvanda er greiðslujöfnun.

Þessi ömurlegu úrræði voru samin af fólki sem þiggur margföld lágmarks laun af umbjóðendum sínum, sem margir hverjir þurfa á slíkum úrræðum að halda. Það versta af þessu öllu er að samhliða greiðslujöfnun var búin til ný vísitala sem tengd er launaþróun og atvinnustigi.

Við hljótum að krefjast sambærilegra úrræða til þeirra sem komu okkur í þessi vandræði. Þessi hugmynd gæti komið í veg fyrir að bestu bitunum verði komið, skuld litlum, í hendur útvaldra vildarvina þeirra sem nú stjórna. Af hverju að afskrifa þegar við getum eyrnamerkt almenningi heimturnar næstu 40 árin?