Blekkingar lífeyrissjóða

Það er óþolandi að horfa upp á blekkingar lífeyrissjóða.

Margir þeirra reyna vísvitandi að blekkja grandalausa sjóðsfélaga með tali um lítinn rekstrarkostnað, siðferði í fjárfestingum og heilindi í hagsmunagæslu fyrir hönd umbjóðenda sinna, meðan forstjórar og stjórnendur hugsa fyrst og fremst um eigið skinn og sinna nánustu valda-vina. Þetta er gert með vægast sagt villandi framsetningu á tölulegum staðreyndum.

Þekktustu dæmin eru villandi upplýsingar um rekstrarkostnað og ávöxtun þar sem sumir sjóðir setja fram himinháa rekstrartekjuliði til að lækka sýnilegan rekstrarkostnað og setja hann fram sem hlutfall af heildareignum. Blekkingarleikurinn felst einnig í því að setja fram gríðarlega velgengni í ávöxtun og taka sem dæmi 5 ára ávöxtun yfir mestu uppsveiflutímabilin í stað10-15 ára meðalraunávöxtunar sem nær þá yfir a.m.k. eitt niðursveiflutímabil. Undantekningarlaust er sú ávöxtun litlu hærri en meðalraunávöxtun verðtryggðra innlánsreikninga.

Svo er vísað til hinna ýmsu tryggingafræðilegu úttekta og útreikninga máli sínu til stuðnings svo að sjóðsfélagar skilji örugglega ekkert í því sem þeir eru að segja eða gera, heldur taki villandi upplýsingum sem heilögum sannleika.

Í ljósi þess að rekstrarkostnaður lífeyrissjóða á Íslandi er ekki undir 3 milljörðum ákvað ég að taka smá dæmi sem er beint úr ársskýrslum nokkurra sjóða.

Hér er dæmi um rekstrarkostnað nokkurra stærstu lífeyrissjóðanna.

	Rekstrarkostn.	Launakostn.	Stöðugildi	Forstj.laun
Lsj. starfsmanna ríkisins	815.281.000	245.000.000	38,4	19.771.000
Lífeyrissj. Verslunarmanna	424.426.000	269.000.000	27,5	30.000.000
Gildi lífeyrissjóður	367.750.000	188.373.000	23	21.534.000
Sameinaði Lífeyrissjóðurinn	237.346.000	135.463.000	16	16.768.000
Stapi Lífeyrissjóður	173.494.000	86.000.000	11,6	12.917.000
Stafir	153.420.084	94.290.790	10,5	19.048.011
Samtals.	2.171.717.084	1.018.126.790	127	120.038.011

Þetta eru 6 af 37 sjóðum sem taka við iðgjaldi. Hafa ber í huga að margir þeirra eru smáir og umsýsla þeirra er í höndum bankanna sem taka umsýslugjald fyrir.

Það er sorglegt til þess að hugsa hve miklu sjóðirnir hafa tapað án þess að koma hreint fram við sjóðsfélaga sína og opna bækur sínar og viðurkenna tapið.

Í staðinn eru viðhafðir endalausir feluleikir og talnaútúrsnúningar.

Rekstrarkostnaður sjóðanna er algerlega glórulaus í ljósi þess að fjárfestingar sjóðanna eru að upplagi nákvæmlega eins. Það er hreint með ólíkundum að ekki skuli vera búið að sameina og hagræða meira en raun ber vitni.  Til hvers er verið að reka alla þessa sjóði sem gera nánast það sama?

Það sem aðallega hefur staðið í vegi fyrir sameiningu sjóða er þríþætt:

1. Sjóðirnir standa misvel og hafa mjög mismunandi samtryggingu fyrir sína sjóðsfélaga, en þetta eru megin rök þeirra sem stjórna.

2. Sjóðirnir standa fyrir mismunandi hagsmunagæslu fyrirtækja, þ.e. sum fyrirtæki setja það sem skilyrði við ráðningu starfsfólks að það greiði í tiltekinn lífeyrissjóð sem hugnast viðkomandi fyrirtæki og veitir því t.d. aðgang að fjármagni. Enda eru Samtök Atvinnulífsins ráðandi afl í flestum lífeyrissjóðum.

3. Stjórnendur sjóðanna hafa öðlast gríðarleg völd og eru með valdamestu mönnum þjóðarinnar í viðskiptalífinu. Þessi völd verða ekki gefin eftir átakalaust, en í ljós hefur komið að hagsmunagæsla þessara aðila er í fæstum tilfellum í þágu eigenda, þ.e. sjóðsfélaganna.Aðeins brot af því rugli sem viðgengist hefur í sjóðunum hefur litið dagsins ljós. Fyrir vikið er  ekki skrítið að þeir verji sig með þessum hætti.

Tap sjóðanna er varlega áætlað að lágmarki um 40% -50% af öllum eignum.

Klíkustefna hefur viðgengist í fjarfestingum sjóðanna um áratugaskeið enda hafa sjóðirnir ákvörðunarvald um hverjir fá að eignast og reka fyrirtækin og hverjir ekki. Þetta ákvörðunarvald birtist m.a. í formi stjórnasetu í stærstu fjármálastofnunum landsins þar sem stjórnarmenn sjóðanna sitja í bankastjórnum og ráðstafa völdum til vildarfyrirtækja og vildarvina.

Þekkt dæmi um óheftan aðgang fyrirtækis að fjármagni úr sjóðum lífeyrissjóðs og banka í hans eigu, er dæmi Víglunds Þorsteinssonar eiganda og stjórnarformanns BM-Vallár og fyrrverandi stjórnarformanns Lífeyrissjóðs Verslunarmanna. Þetta væri ekki í frásögu færandi nema fyrir þær sakir að BM-Vallá hefur ekki skilað ársskýrslum til RSK síðan 1995, sem er jú grunnforsenda eðlilegra lánveitinga við mat á greiðslugetu og áreiðanleika fyrirtækja, fyrir utan að vera ólöglegt. Ætli þeir hafi verið beittir dagsektum fyrir vikið?

Dæmi um villandi framsetningu:

Stafir Lífeyrissjóður

Rekstrarkostnaður var aðeins 84,5 milljónir árið 2007

Bls. 4 í ársskýrslu Lífeyrissjóðsins Stafa frá árinu 2007

“Rekstrarkostnaður sjóðsins á árinu 2007 var 84,5 milljónir króna og lækkaði um

37,3 milljónir króna eða um 31% frá fyrra ári. Rekstrarkostnaður sem hlutfall af

iðgjöldum hefur því lækkað um rúmlega 2,3 prósentustig sl. 2 ár. Heildarkostnaður,

þ.e.a.s. rekstrarkostnaður að viðbættum fjárfestingagjöldum, lækkaði um 32,9

milljónir króna frá fyrra ári eða um 17,8%. Hefur þá að fullu verið tekið tillit til

sameiningarkostnaðar frá 2006. Á fyrsta heila starfsári sínu náðist því fram mikil

hagræðing og reyndar mun meiri en áætlanir gerðu ráð fyrir miðað við árslok

2007.” Sem hlutfall af eignum var rekstrarkostnaður aðeins 0,1%.

 
Hvernig getur rekstrarkostnaður verið 84,5 milljónir þegar launakostnaður er 94.3 milljónir ?

Sjóðirnir virðast búa til rekstrartekjulið á móti kostnaði til að blekkja sjóðsfélaga.

Rekstrarkostnaður sjóðsins á 10,5 stöðugildi var 153.420.084,-

Bls. 33 í ársskýrslu Lífeyrissjóðsins Stafa frá árinu 2007

Fjárfestingargjöld
Skrifstofu- og stjórnunarkostnaður .....................................  68.885.618

Rekstrarkostnaður
Skrifstofu- og stjórnunarkostnaður .....................................  84.534.466

Bls. 41 í ársskýrsla Lífeyrissjóðsins Stafa frá árinu 2007

Laun og launatengd gjöld greinast þannig:

Laun                                                                             79.313.976

Launatengd gjöld                                                            14.976.814

Samtals launakostnaður                                                 94.290.790

Laun og tengd gjöld sbr. ofar skiptist á milli rekstrarkostnaðar og fjárfestingargjalda.

Stöðugildi árið 2007 voru 10,5

Ólafur Sigurðsson, framkvæmdarstjóri var með 19.048.011 í laun.

Gildi Lífeyrissjóður.

Bls. 34
Fjárfestingargjöld:             

Skrifstofu- og stjórnunarkostnaður                  125.233.000
Rekstararkostnaður:

Skrifstofu- og stjórnunarkostnaður                  242.517.000

Rekstrarkostnaður samtals          367.750.000

Laun á 23 Stöðugildi.

Launatengd gjöld                                              188.373.000

Árni Guðmundsson, framkvæmdastjóri            21.534.000

 

LSR Lífeyrissjóður starfsmanna Ríkisins.

Rekstrarkostnaður LSR og SH  Bls. 50

Skrifstofu- og stjórnunarkostnaður     270.169.000

Annar rekstrarkostnaður                        9.502.000

Rekstrarkostnaður alls                  279.671.000

Fjárfestingargjöld

Skrifstofu- og stjórnunarkostnaður     187.331.000

Önnur fjárfestingargjöld                     348.279.000

Fjárfestingargjöld alls                   535.610.000

Samtals Rekstrarkostnaður      815.281.000

Bls. 78
Launakostnaður og fjöldi starfsmanna
Hlutdeild sjóðsins í heildarlaunakostnaði Lífeyrissjóða Bankastræti 7 nam 245 millj. kr. árið 2007. Hann skiptist þannig að heildarlaun voru 203,6 millj. kr. og launatengd gjöld 41,4 millj. kr. Stöðugildi hjá Lífeyrissjóðum Bankastræti 7 voru 38,4 á árinu 2007 og hlutdeild sjóðsins metin 35,3 stöðugildi.

17. Laun til stjórnar, framkvæmdastjóra og endurskoðenda

Heildarlaun til stjórnar og framkvæmdastjóra sjóðsins á árinu 2007 greinast þannig:

Ögmundur Jónasson, stjórnarformaður 2007 1.520.000

Birna Lárusdóttir 760.000

Eiríkur Jónsson 805.000

Gunnar Björnsson 775.000

Maríanna Jónasdóttir 1.186.000

Páll Halldórsson 802.000

Sigrún Valgerður Ásgeirsdóttir 760.000

Trausti Hermannsson 820.000

Varamenn í stjórn:

Elna Katrín Jónsdóttir 23.000

Ingvi Már Pálsson 46.000

Viðar Helgason 91.000

Þórhallur Vilhjálmsson 137.000

Samtals greiðslur til stjórnarmanna 7.727.000

Haukur Hafsteinsson, framkvæmdastjóri LSR og LH  19.771.000

 

Lífeyrissjóður Verslunarmanna.

Fjárfestingargjöld

Skrifstofu- og stjórnunarkostnaður . . . . . . . . . . . . . . . . . . . . . . 221.211.000

Rekstrarkostnaður

Skrifstofu- og stjórnunarkostnaður . . . . . . . . . . . . . . . . . . . . . . 203.215.000

Samtals Rekstrarkostnaður                                                        424.426.000

Launakostnaður                                                                          270.000.000

Þorgeir Eyjólfsson framkv.stjóri                                                     30.000.000

Stöðugildi eru 27,5

Ef veitt væru verðlaun fyrir mest villandi framsetningu gagna þá væri Þorgeir Eyjólfsson Íslandsmeistari.

Þorgeir Eyjólfsson forstjóri Lífeyrissjóðs verzlunarmanna:“Rekstrarkostnaður LV hefur ætíð verið með því lægsta sem gerist meðal lífeyrissjóða landsins og var til dæmis 0,05% í hlutfalli af eignum á árinu 2007”.

Eignir voru í árslok 2007 rúmir 269 milljarðar. Þá ætti rekstrarkostnaður 0,05% einungis að vera 135 milljónir. Þegar launakostnaður einn og sér er 270 milljónir getur þetta ekki staðist, enda gufar þessi raunkostnaður ekki upp í bókhaldstilfæringum, svo mikið er víst.

Hvað ætli Þorgeir sé með í laun sem hlutfall af þjóðarframleiðslu eftir skatta og afborganir lána ?

Líklega væri útkoman ekki mjög há.

Dæmi um villandi upplýsingar frá landsambandi lífeyrissjóða.

 ”Gjaldmiðlavarnarsamningar lífeyrissjóðanna hafa dregið úr sveiflum á gjaldeyrismarkaði.

Það er villandi að tala um að lífeyrissjóðir hafi tekið stöðu með krónunni og „veðjað“ á að hún myndi styrkjast þar sem ekki er hægt að aðskilja erlendu eignirnar og gjaldmiðlaskipta- samningana. Það er ennfremur beinlínis rangt að halda því fram að íslenskir lífeyrissjóðir hafi stundað spákaupmennsku með gjaldmiðilinn, þvert á móti hafa þeir stuðlað að sveiflujöfnun á innlendum gjaldeyrismarkaði, öfugt við spákaupmennsku sem stuðlar að ýktum sveiflum á gjaldeyrismarkaði.”

Grein Hrafns Magnússonar, framkvæmdastjóra Landssamtaka lífeyrissjóða sem birtist í Morgunblaðinu.

Ef það væru til viðurlög við rakalausum þvættingi þá væri Hrafn í afar slæmum málum.

Bankarnir gátu ekki veðjað gegn krónunni nema hafa einhvern til að veðja á móti.

Það þarf að lágmarki  tvo til að gera veðmál.

Kær kveðja

Ragnar Þór Ingólfsson.

Athugasemdir

[Jón Gerald Sullenberger, 6.2.2009 kl. 12:31]

Sæll Ragnar Þór þetta eru sláandi tölur hefur þetta verið birt í blöðum eða á Eyjuni?

[Ragnar Þór Ingólfsson, 6.2.2009 kl. 12:57]

Sæll Jón 

Ég held að það séu afar fáir sem nennt hafa að lesa sig í gegnum ársreikninga sjóðanna. Þeir örfáu sem halda athyglinni fyrstu 30-40 blaðsíðurnar af þakkarræðum og lofsöng stjórnenda, enda að lokum í bláköldum staðreyndum.

Ég hef fengið einhverja athygli á þessari baráttu minni enda sendi yfirleitt afrit af þessu til fjölmiðla. Þeir hafa verið arfaslakir hingað til við að fjalla um þessi má, enda töluvert mikil vinna að fara í gegnum öll þesssi gögn.

Maður verður jú að vona að þeir taki einhverntíman við sér.

Þú hefur veitt mér mikin innblástur í þessari baráttu minni og sýnt okkur íslendingum svo ekki verði um villst að þetta skilar á endanum árangri, þó seint verði verður það þess virði.

Kær kveðja 

Ragnar 

[Ég, 6.2.2009 kl. 12:57]

Það heldur bara áfram að sullast ógeð út úr þessu gati sem þú stakkst á lífeyrissjóðspokann :)

[Theódór Norðkvist (IP-tala skráð) 6.2.2009 kl. 13:09]

Þetta eru ótrúlegar tölur og sýna hvers kyns blóðsugur lífeyrissjóðirnir eru orðnir. Takk fyrir að vekja athygli á þessu.

[Haraldur Baldursson, 6.2.2009 kl. 14:58]

Sæll Ragnar.

Ég játa þá synd á mig að lesa ekki allar línur frábærrar færslu þinnar. Gríðarlegar kröfur hljóta að vera gerðar til þeirra sem þigga þurfa 30 milljónir fyrir ársstarfið. Við hljótum að vera að tala um 18 klst. á dag 7 daga vikunnar og án sumarleyfis. Það er svo víða orðin þessi gengdarlausa sjálftaka að manni falla hendur.

[Ragnar Þór Ingólfsson, 6.2.2009 kl. 15:12]

Þakka innlit og athugasemdir.

Varðandi vinnutíma og 30 milljónir sem dagvinnukaup neyðast þessir forstjórar til að sitja í stjórnum fyrirtækja í dagvinnutíma lífeyrissjóðanna og þiggja enn meiri pening fyrir, einnig þurfa þessir menn að þola endalausar "lúxus" fjárfestingaferðir þar sem rauðum dregli er rúllað fyrir framan þá hvert sem þeir koma. Það versta af ölllu er að þurfa að fara á knattspyrnuleiki í VIP stúkum, skíðaferðir ofl. en sem betur fer eru til einkaþotur til að koma til móts við öll erfiðin sem fylgja þessu starfi.

Kveðja

Ragnar 

[Ágúst Guðbjartsson, 6.2.2009 kl. 15:56]

Þetta er magnað.

Maður verður kjaftstopp þegar maður sér svona tölur.

Þessir menn sitja þarna í skjóli SA og Verkalýðsforustunnar........villa verkalýðsforustan situr í stjórnum þessara sjóða t.d eru Sigurður Bessason og Gunnar Páll formenn sína sjóða. 

Baráttan heldur áfram vel gert Ragnar.

[Sveinn hinn Ungi (IP-tala skráð) 6.2.2009 kl. 16:15]

Ekki nóg með að þeir hafi verið svo vitlausir að veðja á að krónan ætti eftir að hækka þó hún hafi verið allt of hátt skráð, heldur lánuðu þeir auðmönnum hlutabréf sem þeir máttu "skortselja" frekar en selja sjálfir bréfin og innleysa hagnaðinn. Um þetta var opnu grein í Mogganum í haust.

Á Íslenska markaðnum hefur ekki verið hægt að skortselja hlutabréf, en auðmenn fundu þessa aðferð. Þeir töluðu stjórnendur lífeyrissjóðanna inn á að lána sér bréfin. Þessi bréf seldu þeir síðan og markaðurinn hrundi. Fróðlegt væri að vita hvernig þessum samningum hefur verið lokað.

Hvernig geta auðmennirnir orðið sér út um bréf til að skila til baka?

Mynni á að fyrst eftir að Glitnir féll, voru bréfin enn á markaði í nokkra daga. Þá voru mjög lífleg viðskipti með bréfin sem margir furðuðu sig á. Líklega hafa menn þarna verið að kaupa bréf til að geta skilað til lífeyrissjóðanna.

[Ragnar Þór Ingólfsson, 6.2.2009 kl. 16:51]

Sæll Ágúst

Það er sárt til þess að hugsa að verkalýðsforingjarnir sem áttu að gæta hagsmuna okkar hafa kvittað undir þetta glórulausa bull þegjandi og hljóðalaust.

Sæll Sveinn 

Tekið úr 35gr. laga um lífeyrissjóði. 

[Þrátt fyrir ákvæði 3. mgr. er þeim lífeyrissjóðum sem keyptu óskráð bréf tengd húsnæðislánum Byggingarsjóðs ríkisins og Byggingarsjóðs verkamanna á árunum 1972 til 1994 heimilt að flokka þau sem skráð bréf skv. 1. tölul. 1. mgr.]³⁾
[Lífeyrissjóðum er ekki heimilt að fjárfesta eða eiga í fjárfestingarsjóðum skv. 7. tölul. 1. mgr. sem fjármagna sig með lántöku eða skortsölu.]⁴⁾
[Ákvæði þessarar greinar eiga einungis við um samtryggingardeildir lífeyrissjóða.]^1)
   1)L. 171/2008, 10. gr. ²⁾L. 28/2006, 2. gr. ³⁾L. 56/2000, 7. gr. ⁴⁾L. 70/2004, 4. gr. ⁵⁾L. 148/2004, 1. gr. ⁶⁾L. 65/2002, 5. gr. ⁷⁾L. 84/1998, 7. gr. ⁸⁾L. 140/2006, 1. gr.

Lögin hafa að öllum líkindum verið brotin en hver á að kæra.

Ég er margbúin að reyna að fá LV til að senda mér gögn um gjaldeyrisskiptasamninga,yfirlit yfir skuldabréfalán ofl. Þeir vísa mér ítrekað á ársreikninga, þó svo að ég eigi þessa peninga ásamt meðsjóðsfélögum mínum. 

Það er til marks um valdahrokan í Þorgeiri Eyjólfssyni forstjóra LV að koma ekki fram og skýra út skelfilega stöðu mála. 

[Ragnar (IP-tala skráð) 6.2.2009 kl. 17:22]

Skoðið www.nyttisland.is

[Júlíus Björnsson, 6.2.2009 kl. 17:54]

Ragnar, hæfni manna til að halda kostnaði í lágmarki er meiri því minni sem kostnaðurinn er.  Hversvegna er ekki búið að ráð viðkomandi tossa? Hvernig stendur á því að þeir voru ráðnir í upphafi? Hjarðmunstrið er áberandi það kalla þegjandi samráð [samræði] þegar minnihluta þjóðarinnar er að ræða.

	Rekstrarkostn.	Meðallaun	Meðallaun	Tímakaup
	/Stöðugildi		án forstjóra	1650 tímar
Ríkið	21.231.276	6.380.208	5.865.338	3.866
VR	15.433.672	9.781.818	8.690.909	5.928
Gildi	15.989.130	8.190.130	7.253.869	4.963
Samein	14.834.125	8.466.437	7.418.437	5.131
Stapi	14.956.379	7.413.793	6.300.258	4.493
Stafir	14.611.436	8.980.075	7.165.978	5.442

 Dýr ákvörðunar og vörslulaun?

Ásmundur kanna reikna sér og sínum í hag. Við hin 99% í lýðræðis þjóðveldis þar sem sígild frjálshyggja á að ríkja: heiðarleg samkeppni til að halda sameiginlegum kostnaði þjóðarinnar í lágmarki. 

ESB Ný-aðals Kandídatarnir eru samir við sig. New-Liberism er það betra en Neo-liberism?  Animal Farm or  Orwell:Eric Arthur Blair. Stóri bróðir er allstaðar.

[Árni Gunnarsson, 6.2.2009 kl. 22:08]

Ragnar. Það er auðvitað ekki annað hægt en að láta sér ofbjóða öll þessi skelfilega græðgi. En það er nokkuð síðan ég fór að líta öðrum augum á þetta vesalings fólk. Þarna er á ferðinni sjúkdómur og hann er illkynja í þá veru að hann er smitandi. En svo spyrjum við; af hverju látum við þetta yfir okkur ganga? Og svarið er að við erum orðin meðvirk sjúklingnum, rétt eins og maki alkaholistans verður meðvirkur og ver hann með lygi og afsökunum. Og þessi meðvirkni eflist við vitneskjuna um að við getum ekkert gert, eða teljum svo vera. En ég væri hræsnari ef ég segðist vorkenna þessum görmum því ég geri það ekki í fullri merkingu. Ég er reiður út í þetta fólk vegna siðblindunnar sem ekki er hægt að afsaka vegna þess að skynsemin á að segja þessu fólki að skammast sín. Rétt eins og alkaholistinn skammast sín innra með sér og viðurkennir það oftast ef á hann er gengið.

[Þórarinn Þ Gíslason (IP-tala skráð) 6.2.2009 kl. 23:18]

Sæll Ragnar.

Þetta er magnað.

Ég á eftir að skoða þetta betur í næði.

Takk fyrir þetta framlag þitt.

[(IP-tala skráð) 7.2.2009 kl. 01:27]

Mér finnst þetta svo frábært framtak hjá þér, að ég á eignlega ekki til orð. Vildi að ég gæti lagt þér eitthvert lið í þessu,  en þarna ættu fjölmiðlar að fara skammast til að vinna vinnuna sína. þá myndast þrýstingur sem þarf til að hreinsa þarna út eins og annars staðar.

Ragnar!..... takk fyrir kærlega.

[Helga Kristjánsdóttir, 7.2.2009 kl. 03:13]

 Hvar erum við stödd,þjóðarlíkaminn alsettur kýlum, að því leiti er kreppan til gagns að nú er hlustað;   Ragnar takk.

[Einar Örn Einarsson, 7.2.2009 kl. 04:02]

Þakka þér kærlega fyrir þetta Ragnar.

Maður þarf smá tíma til að melta þetta.

Þarna þarf að særa menn út, þetta er okkar fjármagn sem menn eru að fara svona með. Þetta er svo sannarlega partur af þessum dæmalausu óförum þjóðarinnar.

[Magnús Bergsson, 7.2.2009 kl. 11:36]

Þúsund þakkir Raggi. Tölur í tíma töluð

Ég segi eins og margir aðrir. Ég þarf tíma til að melta þetta. Mér sýnist í fljótu bragði að búsáhaldabyltingunni sé hvergi lokið.

[Óskar Þorkelsson, 7.2.2009 kl. 12:08]

ég vil fá allan minn lífeyrir greiddan út, pronto !! þetta pakk á ekki að vasast með mína framtíð.. 

[Júlíus Björnsson, 7.2.2009 kl. 13:59]

Eru ekki bifreiðar, sími, dagblöð, fæði, innanland, og utanlandferðir, uppihald, ,,, talið til rekstrarkostaðar almennt hjá forréttinda stéttunum Íslensku ?

Einhvern tíman heyrði ég það að í USA færi þetta allt inn í heildarlaunum [forstjóra] og þar með talin kostnaður vegna aðstoðarmanna.

[ASE (IP-tala skráð) 7.2.2009 kl. 15:53]

Þakka þér kærlega fyrir, þetta er frábær samantekt hjá þér. 

Það er enn og aftur með eindæmum hvernig hlutir hafa getað farið gjörsamlega úr böndunum í þessu samfélagi okkar.  Fólk eins og þú ert að gera meira fyrir þjóðina en margir sem þjóðin borgar laun.  Takk.

[Marinó G. Njálsson, 7.2.2009 kl. 21:48]

Ragnar, þetta eru ákaflega áhguaverðar tölur hjá þér.  Mig langar þó að benda þér á eitt, sem þú virðist misskilja.  Sjóðurinn þarf að greiða alls konar þóknanir tengdar fjárfestingum sínum.  Það er því eðlilegt, skiljanlegt og raunar krafa að skilið sé á milli almenns rekstrarkostnaðar og fjárfestingastarfsemi.  Þó svo að sjóðirnir hafi sérstaka starfsmenn í vinnu við að stýra fjárfestingum, þá þurfa þeir að leita út fyrir sjóðinn eftir ráðgjöf.  Þetta er líka krafa, þar sem betur sjá augu en auga.  Hvort þetta réttlæti þessar háu tölur, sem þú nefnir, veit ég ekki og ég er heldur ekki að reyna að réttlæta þær.

Sjóðfélagar hafa valdið, ef þeir kæra sig um það.  Stjórn er kosinn á aðalfundi en misjafnlega flókið er að komast að.  Reglur sumra sjóða bera þess merki, að sjóðfélögum er gert mjög erfitt með að komast að og ráða stéttarfélögin öllu, meðan aðrir eru galopnir.  Svo er Söfnunarsjóður lífeyrisréttinda, en fjármálaráðherra skipar stjórn hans til fjögurra ára í senn.  Núna síðast frá 1. jan. 2009.

[Ragnar Þór Ingólfsson, 7.2.2009 kl. 22:30]

Þakka öllum sem hér skrifa.

Marinó

Ég er ekki að misskilja neitt varðandi skiptingu á þessum kostnaði í ársreikningi. Ég veit vel að þeir verða að skilja þennan kostnað í sundur og þurfa að greiða þessi fjárfestingargjöld og sundurliða í ársreikningum samkv.lögum.

Ef þú lest greinina aðeins betur þá sérðu hvað ég að gagnrýna.

Ég er að gagnrýna það að sjóðirnir eru að hreykja sér með lágum rekstrakostnaði eins og t.d. LV gerir með því að setja fram sem hlutfall af eignum 0,05% sem er rétt um helmingur af launakostnaði. Þarna er beinlínis verið að gefa villandi upplýsingar.  Stapi er eini lífeyrissjóðurinn af þeim sem ég nefni sem setur fram restrakostnað sjóðsins með skýrum og góðum hætti að mínu mati í ársreikningi sjóðsins.Við skulum ekki gleyma því að við sjóðsfélagar þurfum að lesa okkur í gegnum tölurnar og því afar mikilvægt að þær séu settar fram á einfaldan og aðgengilegan hátt.

Svo er það aðalmálið, kostnaðurinn við þessa sjóði sem eru að upplagi að gera það nákvæmlega sama.

Kveðja

Ragnar

[Ragnar Þór Ingólfsson, 7.2.2009 kl. 22:46]

Júlíus

Eins og þú hefur réttilega bent á í skrifum þínum þá er sárt til þess að hugsa að öll þessi brenglaða ávöxtunarkrafa sjóðanna og fjármálafyrirtækja, sem ekki er í neinu samræmi við þjóðarframleiðslu,fólksfjölgun osfrv. skuli brenna upp í öllu þessu ein björn tví björn þrí björn kerfi.

Við skulum ekki gleyma þeim kostnaði sem við sjáum ekki. 

Á eftir sparifé okkar eru biðraðir manna og fyrirtækja sem vilja komast í sjóði okkar og allir halda þeir á rauðum dreglum með vasa fulla af ölmusum til handa sjóðstjórum og forstjórum sjóðanna, tilbúnir að beygja lög og reglur ef þeir hafa árangur erfiðis,enda eftir miklu að slægjast.

Aftast í röðinni stendur svo Helgi í Góu að betla út örfáar prósentur til handa sjóðsfélögum sjálfum svo eftir þeim bíði þjónustu íbúðir í stað biðlista eftir kústaskápum þegar vinnuskyldu líkur.

[Ásta Rut (IP-tala skráð) 7.2.2009 kl. 22:52]

Takk fyrir að taka þetta saman.... dettur ekkert annað í hug en helvítis fokking fokk!

[Árni Gunnarsson, 7.2.2009 kl. 22:57]

Fyrir hvern andskotann er enduskoðendum þessara stofnana greitt kaup?

Einn gegnheilasti maður hvað allan heiðarleika varðar sem ég hef kynnst á minni ævi er lærður endurskoðandi og afar mikis virtur af öllum sem hann þekkja. Ég hef ekki leyfi til að nefna nafn hans en langar til þess. Hann var bókhaldari lengi og ef ég man rétt fjármálastjóri hjá þekktu fyrirtæki með mikil umsvif, allt þar til hann fluttist úr því sveitarfélagi.

Nýlega fluttur á höfuðborgarsvæðið tók hann við bókhaldi landsþekkts fyrirtækis sem reyndar átti ekki langa sögu en henni lauk með miklum átökum sem öll þjóðin fylgdist með. Að viku liðinni kvaddi hann og gekk út. Þrátt fyrir nána vináttu við mig hefur hann ekki viljað ræða ástæður brotthvarfs síns en ég gekk þess þó ekki dulinn að hann hafði ekki viljað tengja nafn sitt við þá viðskiptahætti sem þar voru stundaðir.

Við þurfum fleiri endurskoðendur með þetta siðferði að leiðarljósi.

[Sigrún Jóna (IP-tala skráð) 7.2.2009 kl. 23:42]

Fjölmiðlar ættu heldur að vera með fókusinn á þessu, heldur herði torfa núna.

Lífeyrissjóðirnir eru kaup verkafólks og ætti eiginlega að vera sett á kennitölu hvers og eins launamanns. og að hann hefði eitthvað að segja um hvernig ávöxtun á þessum hluta launa sinna væri farið. 

En í staðinn veit hann minna en ekki neitt og hefur ekki neinn í stjórn lífeyrissjós síns og svo fellur allt til sjóðsins ef hann deyr um "aldur fram".

[Júlíus Björnsson, 7.2.2009 kl. 23:50]

Í heimabankanum brennur séreignalífeirinn hratt upp frá áramótum ætli sama sé ekki á döfinni hjá lífeyrissjóðunum hér fyrir ofan.

Verðbréfamarkaðir voru ekki fundir upp í gær. Mér var sagt að eftir stríð Í Danmörku voru strangar reglur um hvernig mætti fjárfesta fjármuni sjóðfesta. Dýr kostnaður við ráðgjöf gefur til kynna að um tvíræða fjárfestingar var að ræða en ekki hófsama ávöxtunar kröfu. Yngri kynslóðir eiga ekki að borga fyrir þær eldri það sem þær greiddu ekki.

[Rakel Sigurgeirsdóttir, 8.2.2009 kl. 05:28]

Ragnar: Vildi bara segja þér hvað ég er ánægð með þig! Þarf reyndar að taka mér tíma í að fara almennilega yfir það sem þú ert að skrifa hér en sé að það eru þjóðþrifamál og flestir pistlarnir þínar hljóta að útheimta þó nokkra vinnu!

Ég tók mér það leyfi að afrita þessa færslu til að prenta hana út og lesa hana síðar í góðu tómi. Mig grunar líka að það sé meiri en full ástæða til að fylgjast með þessum sjóðum... en það er kannski ekki að marka svona tortryggnistrítil eins og mig sem hef alltaf tortryggt líferyissjóðina þó ég viðurkenni að hugmyndin á bak við þá sé góð

[Ragnar Þór Ingólfsson, 8.2.2009 kl. 09:45]

Þakka innlit of athugasemdir.

júlíus

Góður punktur!

Sparnaður verður aldrei betri en það sem sýslað er með hann. þ.e. séreignasparnaður með sínu mótframlagi og skattaívilnun verður aldrei betri sparnaður en annar nema varlega sé farið með hann. Það hefur nú heldur betur sýnt sig. Það vöru sömu menn sem sögðu okkkur að við værum asnar ef við færum ekki í séreign þar sem við fáum 50% ávöxtun strax með mótframlagi og ávöxtun af skattinum sem við fáum lánað vaxtalaust. þeir gleymdu hinsvegar að segja okkur að þessir sjóðir voru notaðir í áhættufjæarfestingar og annað brask, voru jafnvel látnir brenna inni með eignir meðan elítan losaði sitt. Einnig gleymdist að láta fólk vita að skattaprósentan er mjög lág þ.e.37,5% en gæti orðið 50% þegar þú tekur aurin út.

Rakel

Það fer mikill tími í þetta hjá mér og það tekur mig stundum nokkrar vikur að vinna svona pistla. þessi pistill er hinsvegar skrifaður sem undanfari annars sem ég er búin að vinna, um raunverulegt tap sjóðanna og er að vinna þá vinnu á kvöldin með aðstoð fólks sem hefur haft samband við mig óumbeðið en blöskrað blekkingar og fegrunaraðgerðir þessara manna.

sem betur fer hefur mér borist kærkomin liðsauki til að klára greinina og verður hún vonandi birt á næsta föstudag ef allt gengur vel. mér er mikið í mun að geta rökstutt vel það sem ég skrifa um og þær tölur sem þú sérð eru opinber gögn sem eru sett í rétt samhengi.

í hópin eru komin hagfræðingur,viðskiptafræðingur (master) tveir verðbréfamiðlarar sem eru að fara yfir gögnin mín fyrir næstu grein.

Það sem skiptir samt öllu og mestu máli er fólkið sem les þetta og þeir sem hafa bent mér á tengingar lykilmanna,sögur útí bæ osfrv. sem ég hef farið svo ofan í saumana á og fengið staðfest ef á rökum reistar.

Annars þakka ég öllum kærlega þær frábæru viðtökur við þessum pistlum mínum.

kær kveðja

Ragnar

[Páll Ingi Magnússon (IP-tala skráð) 8.2.2009 kl. 11:24]

Sæll Raggi

Mögnuð grein hjá þér. Tek ofan fyrir þér að leggja það á þig að fara í gegnum þennan frumskóg. Þetta sýnir þó svart áhvítu að það þarf að endurskipuleggja þessi mál. 

kv

Palli

[Offari, 8.2.2009 kl. 12:11]

Alltaf eykst spillingin. Það er sama hvert litið er allstaðar virðist spilling vera efst á blaði.

[Rakel Sigurgeirsdóttir, 8.2.2009 kl. 13:21]

Ragnar: Takk fyrir þitt vandaða svar. Það sem ég er búin að lesa af því sem þú skrifar ber einmitt þeim vönduðu vinnubrögðum sem þú lýsir vitni. Þetta er mjög umfangsmikil vinna og átt þú virkilegar þakkir skyldar fyrir að leggja hana á þig!

Ég er núna í undirbúningsnefnd borgarafunda hérna á Akureyri þannig að ástæða þess að ég freistaði þess að fá kannski viðbrögð við innleggi mínu hér að ofan eru ekki aðeins persónuleg. Ég mundi vilja ná sambandi við þig vegna þess mikla og þarfa fróðleiks sem þú ert að miðla hérna. 

Ég fann ekkert póstfang og ég veit að þú finnur heldur ekkert póstfang á síðunni minni. Ætla að láta þig hafa póstfangið mitt í gegnum gestabókina þína þannig að þú getir skrifað mér og látið mig fá símanúmerið þitt. Þá get ég hringt og borið upp erindið sem ég á við þig sem fulltrúi borgarafundarnefndarinnar.

[Þorsteinn (IP-tala skráð) 8.2.2009 kl. 14:06]

Sæll Ragnar og takk fyrir góðan fund síðastliðin föstudagsmorgun.

Ég er búinn að renna létt yfir þetta hjá þér, en ætla að gefa mér betri tíma í það.

Þetta eru sláandi tölur og frásagnir sem að maður trúir varla og vona ég svo innilega að þetta verði enn opinberara en nú er.

Vona það svo innilega að þið komist að og hrindið einræðinu og valdaklíku af stóli.

[Ragnar Þór Ingólfsson, 8.2.2009 kl. 20:42]

Þakka innlit og athugasemdir.

Sæll Palli.

Ég er að vinna ásamt nokkrum reynsluboltum að hugmyndum hvernig bæta má kerfið og breyta. ekki bara niðurrifsstarfsemi :)

Rakel

Takk fyrir það, sendi þér póstfangið mitt. 

Þorsteinn

Takk sömuleiðis.

Fundurinn var mjög góður og greinilegt að meðbyr fyrir þessum málum er mikill meðal fólks og ekki vanþörf á tiltekt.

kær kveðja

Ragnar

[Jón Aðalsteinn Jónsson, 8.2.2009 kl. 22:30]

Frábært framtak